京都遊

一星期0既日本遊又話咁快就完左，真係好唔捨得，呢幾個月成日去日本，再加上Kae同Hugo、Anna同Yuko又0黎過香港，搞到都有0的分唔清自己0係日本定係0係香港！

唔講可能好多人都唔知，我同麻煩妹一個月都會見一次面，過去分別就係香港（12月）、北京（1月）、貴州（2月）、東京（3月）、港澳（4月）、東京（5月）、京都（6月），而未來既七同八月佢都會來香港，嘻嘻

其實可以咁樣去，除左我同麻煩妹份工都多假期之外，一定要多謝國泰航空公司0既恩人甲、麻煩妹個妹妹阿乙，同埋東京留學生低B丙。甲君為我提供特惠機票，每次實在心存感激。乙君唔介意比我去佢屋企住，仲陪我傾計同玩。至於丙君就有點搞笑，因為我先至係佢0既導遊，而佢極其量只係我0既翻譯，但無左佢，麻煩妹唔0係我身邊0既時候我真係完全變左一個啞巴！

講返今次既旅程，實在非常非常正！勁過癮！點好法真係唔知點講，只能夠記底一0的重點，等自己唔好忘記，亦等各位朋友仔羨慕下，嘻嘻！（只重點記京都，因為今次東京只留左一日半，無咩特別）

（21/6）晨早坐子彈火車（第一次坐，好快，但快唔過當年坐法國0既TGV）由東京出發，但搞笑0既係我地兩個都訓到唔知醒，去左大阪，搞到要坐返回程一個站。入住民宿，雖然平價，但個feel都唔錯。特濃拉麵，味道一般，算不上極好。短遊哲學之道，附近嘗自家製雪條同菠蘿汁，好鬼正，勁有睇日本卡通0既舊式小店feel，尤其咁鬼熱0既天氣。首杯京都飲0既咖啡，店開業自1950年，但竟然奉送「小強」一隻，店主連道歉都無句！黃昏再嘗Inoda大咖啡老店，環境一流，唯咖啡只屬中等。入夜一嘗京都料理，0黎個中日漢語辯論，非常搞笑。返宿後扮日本人去公共浴室嘆下，正！

（22/6）落雨。京都大部分0既店同景點都出奇地早關門（4點！），所以一定要盡早出門。晨咁早就去左金閣寺，0係寺內嘆茶同小點，幾好feel。去咖啡工房來個早餐，重點當然係咖啡，非常唔錯的咖啡，店主知我係香港人後仲送左個紀念品比我！之後坐京福電鐵（市內0既小電車仔）去天龍寺，都幾過癮0架，仲0係天龍寺食齋（好過香港寺廟0既齋一千倍），身處世界遺產0既寺院園林食午餐，超勁正！之後遊嵐山一帶，去左非常出名0既望月橋，又去左唔見有遊客但都唔錯既寶嚴院園林，再去勁欣賞0既超靚和服工場，見識左佢0既手工複雜同細緻，明白點解咁多日本女仔會以擁有一件為夢想。再花左好耐去搵咖啡店Yamamoto，環境好到你唔信，有一對播放Bach 0既大喇叭，咖啡則好飲到連飲兩杯，兼買多一包自家焙煎0既咖啡豆！晚上有期待已久0既豆腐宴，十道豆腐菜，再加自家製梅酒，無限感動！返宿後又再去公共浴室一嘆！

（23/6）再來個晨咁早起身，勁熱。麻煩妹話要一試藝伎大變身，0係等佢變身0既同時，我就自己去左遊町屋、高台寺一帶，街道之美，尤勝麗江！至於麻煩妹個藝伎look，嘻嘻 :p......遊清水寺，人多到以為自己返左旺角，不過真係好宏偉。午餐來個全豆宴，平、靚、正！租單車代步，再次感到龐大0既身軀係唔多適合日本0既一切，好似大人在踩小朋友車！遊建仁寺，佢唔算好出名好壯觀，但就係我今次最鍾意0既寺院，因為遊人唔多，非常安寧，園林令人心境平靜（靜到麻煩妹訓左40分鐘！）再遊南禪寺，品嘗茶道，可是跪坐唔夠三分鐘就頂唔順！再去1937年開業0既靜香（Shizuka）咖啡店，老板娘以前係藝伎，好有懷舊味道0既小店，又0黎兩杯咖啡！晚餐係濃味極品鐵板燒，超........好食！一個人去公共浴室，因為麻煩妹自己訓左先！

（24/6）訓到十點幾（之前咁多日都實在太早了）！又係雨天，遊銀閣寺，雨天有好有壞，壞0既就大家都明白，但好0既就係遊人較少，而且我勁怕熱（六月落雨0既話只得二十度，但陽光普照就有三十度以上！）再遊哲學之道、法然院，幾經艱辛先搵到0係山林裏面0既茂庵咖啡室，係間已經有九十年歷史0既木屋，非常滿足。再遊三十三間堂，全都係國寶級古物，出奇0既係遊人唔多，旅遊書大都只係係咁依介紹一下，但實在好得不得了，忍唔住買左本攝影集！之後去京都車站0既伊勢丹食超好食0既寶屋拉麵，再返四食葛根甜品，再去Cattleya咖啡店，一嚐佢聞名0既御神水井水沖0既咖啡，可識只係非常一般。最後晚餐0係伊勢丹0既壽司清解決（每次日本行0既最後一餐都係壽司），水準比唔上東京，但重要0既係夜晚0既京都車店 / 伊勢丹真係好靚！

行程報告完畢，最最最要多謝0既除左之前提過0既甲、乙、丙三君之外，當然係麻煩妹，無左佢，鬼可以係日本玩得咁痛快！

記住我今次教妳0既呢個字：過癮！

題外話：寫廣東話原來難過寫書面語好多，但係無計啦！