難忘的旅程

八月份一共去左四個旅程，其中最難忘0既，一如預計之內：泰國素林0既農村之旅，一個九年前到過0既地方......

九年前，過去曾經有好多唔開心既事發生過，亦有好多難忘和愉快的事情，可以話係對我整個人最有影響的地方，之前從無唸過會再重遊舊地。過去0既事，開心又好，唔開心又好，都一一隨著呢次0既旅程而過去，人生或者就係咁微妙，不斷地打結，又不斷咁解結，又再不斷地打結......
九年前，我還是個學生，老土0的講，我敢話自己係個陽光大男孩！九年後，由學生變為了老師，帶著另一班學生重回舊地。舊地一切仍舊無變，但我0既青春就好似越走越遠，當年0既稚氣和狂傲已被這九年來0既歷煉一一洗淨，心境亦唔能夠回到當年一樣！

當年送我sa long0既好朋友（chang），竟然已變成電影明星，另一個和我交換音樂作品0既好友（love one），佢已經去左老撾（Laos）做志願工作。而最可惜、最遺憾0既係，九年前家訪寄宿時和我玩耍的小朋友，原來早在幾年前已過身了，如果佢還在生的話，應該已經十八歲，但係佢永遠都只會 / 能活0係十五歲......看著招待我留宿0既小孩0既爸媽，心酸0既感覺一直在心頭，久久不下。重遇佢地一家人，實在係我0既福氣，估唔到0既係佢地仲記得我個名，但係得知呢個咁0既消息實在......人生真係太無常......

睇住我帶著的小朋友們，忍唔住對佢地流露出真感情，之前一直提醒自己要同佢地保持一定0既距離，但係每當對住一個又一個青春0既面孔，又點到我再有保留？實在愛上左佢地，希望繼續守護佢地，睇住佢地成長，為佢地打氣、同行！

旅途中更差點無命，在爆布底下游水，一個唔好彩比個男仔踢到，捲左入水底，差點上唔返水面，當時實在好驚，好在......

一切一切，實在都太難忘，返來之後仍一直聽住當地人送的泰文歌（包括依家）。

0係山上睇日出和素描時，為自己過去呢九年寫左一篇半詩半散文0既野，本來想post出來，但最後都係覺得留返一0的野比自己，永遠保留住最好的在心中，咁先係永遠最好0既！